Dwar l-EIGE
Min aħna?
L-Istitut Ewropew għall-Ugwaljanza bejn is-Sessi (EIGE) twaqqaf fl-2010 biex isaħħaħ u jippromwovi l-ugwaljanza bejn is-sessi madwar l-UE.
B’esperjenza ta’ 10 snin fil-ġbir tad-data, fit-twettiq tar-riċerka u fl-iżvilupp tar-riżorsi, l-EIGE sar iċ-ċentru ta’ għarfien tal-UE għall-ugwaljanza bejn is-sessi.
X’nagħmlu?
Qed naħdmu biex l-ugwaljanza bejn in-nisa u l-irġiel issir realtà fl-UE u lil hinn. Aħna rridu li kulħadd ikollu l-istess opportunitajiet, irrispettivament mis-sess.
Ir-riċerka tal-EIGE twitti t-triq għal fehim u sensibilizzazzjoni aħjar dwar l-ugwaljanza bejn is-sessi f’kull qasam tal-ħajja.
Nidentifikaw il-lakuni bejn in-nisa u l-irġiel u niġbru u nanalizzaw id-data dwar l-inugwaljanzi bejn is-sessi. Permezz tal-informazzjoni prattika u bbażata fuq l-evidenza li nipprovdu, nappoġġjaw lil dawk li jfasslu l-politika biex l-Ewropa tkun eqreb lejn l-ugwaljanza bejn is-sessi u titjieb il-ħajja tan-nisa u tal-irġiel.
Għaliex hi importanti l-ugwaljanza bejn is-sessi?
Bir-ritmu attwali tal-progress, xorta għad fadlilna mill-inqas 60 sena biex nilħqu l-ugwaljanza sħiħa bejn is-sessi. L-Indiċi tal-Ugwaljanza bejn is-Sessi tagħna juri li l-UE miexja ’l quddiem iżda b’pass ta’ nemlu biss.
Kien hemm kisbiet żgħar u kostanti kull sena iżda l-pandemija tal-coronavirus tippreżenta theddida għall-progress fl-ugwaljanza bejn is-sessi. Aktar minn qatt qabel, dawk li jfasslu l-politika se jkollhom jużaw id-data, l-evidenza u r-riżorsi tal-EIGE biex ifasslu u jimplimentaw soluzzjonijiet inklużivi li jippromwovu l-ugwaljanza bejn is-sessi fis-soċjetà tagħna, kemm matul kif ukoll wara l-pandemija.
Fuq xiex naħdmu?
L-Indiċi tal-Ugwaljanza bejn is-Sessi
L-Indiċi tal-Ugwaljanza bejn is-Sessi huwa għodda importanti tat-tfassil tal-politika li jkejjel il-progress tal-ugwaljanza bejn is-sessi fl-UE matul iż-żmien. Kull sena, jagħti lill-UE u lill-Istati Membri punteġġ minn 1 sa 100. Il-punteġġ ta’ 100 ikun ifisser li pajjiż laħaq l-ugwaljanza sħiħa bejn in-nisa u l-irġiel.
Il-punteġġi huma bbażati fuq id-distakk bejn in-nisa u l-irġiel u l-livelli ta’ kisba f’sitt oqsma ewlenin: ix-xogħol, il-flus, l-għarfien, il-ħin, il-poter u s-saħħa, u l-oqsma sekondarji tagħhom. L-Indiċi jinkludi żewġ dominji addizzjonali: il-vjolenza kontra n-nisa u l-inugwaljanzi inkroċjati. L-analiżi tal-inugwaljanzi inkroċjati teżamina kif fatturi bħad-diżabilità, l-età, il-livell ta’ edukazzjoni, il-pajjiż tat-twelid u t-tip ta’ familja, jiltaqgħu mal-ġeneru biex joħolqu mogħdijiet differenti f’ħajjet in-nisa u l-irġiel.
L-Indiċi jagħti viżibbiltà lil oqsma li jeħtieġu titjib billi jipprovdi analiżi dettaljata fil-livell nazzjonali u tal-UE għal dawk li jfasslu l-politika.
Tista’ tqabbel ir-riżultati matul iż-żmien u tara fejn jinsab pajjiżek fuq is-sit web tagħna.
Esplora l-Indiċi tal-Ugwaljanza bejn is-Sessi
L-Integrazzjoni ta’ Kwistjonijiet ta’ Ugwaljanza Bejn is-Sessi
Il-Pjattaforma tal-Integrazzjoni ta’ Kwistjonijiet ta’ Ugwaljanza Bejn is-Sessi tagħna fiha l-informazzjoni u r-riżorsi kollha li teħtieġ biex tintegra l-ugwaljanza bejn is-sessi f’xogħlok. Il-pjattaforma tenfasizza l-isfidi tas-sessi f’21 qasam tal-politika, li jvarjaw mill-ambjent sal-kultura. Aħna nagħtu wkoll rakkomandazzjonijiet dwar kif l-aħjar jiġu indirizzati dawn l-isfidi.
Żviluppajna ħafna għodod prattiċi biex ngħinuk tintegra perspettiva tal-ġeneru fl-istadji kollha tat-tfassil tal-politika u tal-ippjanar strateġiku. Is-sett ta’ għodod pass pass tagħna se jiggwidawk permezz tal-proċess ta’ tħejjija, tfassil, implimentazzjoni, monitoraġġ u evalwazzjoni tal-politiki, miżuri regolatorji u programmi ta’ nfiq tal-baġit. Dawn jgħinu lill-organizzazzjoni tiegħek issir waħda b’aktar ugwaljanza bejn is-sessi.
Esplora l-Pjattaforma tal-Integrazzjoni ta’ Kwistjonijiet ta’ Ugwaljanza Bejn is-Sessi
Il-vjolenza abbażi ta’ sess
Il-vjolenza abbażi ta’ sess hija kemm kawża kif ukoll konsegwenza tal-inugwaljanza bejn is-sessi. Għalhekk, parti importanti mill-ħidma tagħna hija li nipprovdu r-riżorsi sabiex din tintemm. Aħna nipprovdu r-riċerka, l-istatistika u l-għarfien espert biex ngħinu biex tiġi mifhuma l-problema u l-mod kif taffettwa lis-soċjetajiet tagħna. Wettaqna firxa wiesgħa ta’ studji rivoluzzjonarji dwar il-vjolenza abbażi ta’ sess fl-Ewropa.
Kemm inħallsu lkoll biex nindirizzaw il-vjolenza? Għaliex għandna bżonn intejbu l-ġbir tad-data mill-pulizija u l-ġustizzja? Il-mutilazzjoni ġenitali femminili hija problema fl-Unjoni Ewropea? Il-vjolenza ċibernetika hija theddida reali? Se ssib tweġibiet għal dawn il-mistoqsijiet u għal ħafna oħrajn fir-riċerka tagħna.
Ara l-ħidma tal-EIGE dwar il-vjolenza abbażi ta’ sess
Il-Bażi tad-Data tal-Istatistika dwar il-Ġeneru
Kemm hemm nisa membri fuq il-bord tax-xandir pubbliku fil-Portugall? X’inhu l-bilanċ tan-nisa u tal-irġiel fuq il-kumitati relatati mal-ambjent fil-Parlament Ewropew? Kemm hija kbira l-popolazzjoni tan-nisa meta mqabbla ma’ dik tal-irġiel fil-Polonja?
Il-Bażi tad-Data tal-Istatistika dwar il-Ġeneru tal-EIGE hija ċentru għall-informazzjoni statistika dwar l-ugwaljanza bejn is-sessi madwar l-UE kollha. Iġġib flimkien data f’għodda interattiva waħda u li faċli tintuża. Esplora l-bażi tad-data u islet id-data li teħtieġ minn angoli differenti. Il-bażi tad-data tagħna tiġi aġġornata kontinwament.
Esplora l-Bażi tad-Data tal-Istatistika dwar il-Ġeneru
Il-Pjattaforma ta’ Azzjoni ta’ Beijing
Biex jappoġġja tfassil tal-politika aktar infurmat fil-livelli tal-UE u tal-Istati Membri, l-EIGE jipprovdi appoġġ lill-Presidenzi tal-Kunsill tal-UE.
Kull sena l-pajjiż li jkollu l-Presidenza jista’ jitlobna neżaminaw aktar mill-qrib wieħed mit-12-il qasam tal-Pjattaforma ta’ Azzjoni ta’ Beijing. Abbażi tar-riċerka tagħna, il-Presidenza tagħmel rakkomandazzjonijiet ta’ politika għall-qasam magħżul.
Il-Pjattaforma ta’ Azzjoni ta’ Beijing hija impenn globali għall-emanċipazzjoni tan-nisa, li ġiet adottata waqt ir-Raba’ Konferenza Dinjija dwar in-Nisa fl-1995. Aħna nappoġġjaw lill-UE u lill-Istati Membri tagħha fil-monitoraġġ ta’ dan l-impenn internazzjonali.
Ara l-ħidma tal-EIGE dwar il-Pjattaforma ta’ Azzjoni ta’ Beijing
Ngħinu lill-Ewropa tikkomunika
M’intix ċert liema terminu għandek tuża? Il-glossarju u t-teżawru online tal-EIGE jipprovdi definizzjonijiet preċiżi u aġġornati għal termini ewlenin relatati mal-ugwaljanza bejn is-sessi. B’dan il-mod nikkontribwixxu għal fehim komuni madwar l-UE kollha.
Il-glossarju issa huwa tradott fi 23 verżjoni lingwistika tal-UE.
Il-glossarju tagħna jevolvi u jinbidel kontinwament, l-istess bħal-lingwa. Ipproponi l-aġġornamenti tiegħek u għinu jikber.
Nagħtu aċċess għal riżorsi vasti
B’aktar minn 500 000 riżorsa, iċ-Ċentru tar-Riżorsi u tad-Dokumentazzjoni (RDC) tal-EIGE huwa punt uniku ta’ għarfien dwar l-ugwaljanza bejn is-sessi. Aċċessa l-ġabra tagħna ta’ dokumenti ta’ politika, kotba, artikli, studji, bażijiet tad-data speċjalizzati u aktar.
Aħna naħdmu ma’ ċentri Ewropej ewlenin ta’ dokumentazzjoni u ta’ informazzjoni li jispeċjalizzaw fl-ugwaljanza bejn is-sessi biex nipprovdu dan is-servizz.
Ħafna minn dawn ir-riżorsi mhumiex disponibbli f’libreriji pubbliċi oħrajn.
Esplora ċ-Ċentru tar-Riżorsi u d-Dokumentazzjoni
Ejjew nitkellmu
L-EIGE huwa dejjem ħerqan biex jaqsam l-aħbarijiet u jilħaq udjenzi usa’. Żomm ruħek aġġornat mal-attivitajiet kollha online tal-EIGE permezz tas-sit web tagħna, kif ukoll permezz ta’ kanali oħra ta’ komunikazzjoni tagħna.
Il-pubblikazzjonijiet kollha tagħna huma disponibbli fuq is-sit web tal-Istitut, permezz taċ-Ċentru ta’ Riżorsi u Dokumentazzjoni (RDC) tiegħu u fl-EU Bookshop.
Id-dħul għall-RDC jinsab fil-pjan terran tal-uffiċċji tagħna f’Vilnius, f’Vilniaus gatvė 10. L-RDC jiftaħ mit-Tnejn sal-Ġimgħa, mid-9:30 sas-13:00 u mis-13:30 sas-18:00.
Għal finijiet ta’ riċerka u informazzjoni dettaljata, tista’ żżur il-librerija speċjalizzata tagħna fir-raba’ sular. Għal aktar informazzjoni jew biex tagħmel appuntament, jekk jogħġbok ikkuntattja lill-RDC fuq rdc@eige.europa.eu
Jekk ikollok xi mistoqsijiet, jekk jogħġbok tiddejjaqx tikkuntattjana fuq eige.sec@europa.eu
Biex iżżomm ruħek aġġornat dwar l-aħbarijiet u l-avvenimenti, segwina fuq Facebook, Twitter u LinkedIn jew abbona għall-bullettin tal-EIGE